कॉपीरायटिंग ही एक अशी कला आहे ज्याच्या मदतीने तुम्ही शब्दाचे रुपांतर पैशामध्ये करू शकता. होय! तुम्ही बरोबर वाचले... थोडक्यात सांगायला गेलं तर ही कला एका सेल्समॅन सारखी काम करते. ज्याप्रकारे एक उत्कृष्ट सेल्समॅन त्याच्या बोलण्याच्या कलेच्या मदतीने ग्राहकांसोबत नाते जुळवून सेवा किंवा वस्तू विकू शकतो. अगदी त्याचप्रमाणे कॉपीरायटिंग ही एक अशी कला आहे जी एका सेल्समॅनसारखे मार्केटिंगचे काम करते. पण सेल्समॅनला प्रत्येक व्यक्ती सोबत वन-टू-वन बोलावे लागते आणि त्याला कन्व्हिन्स करावे लागते. याठिकाणी व्यवसायवाढीमध्ये मर्यादा येते. पण कॉपीरायटिंगच्या मदतीने तुमच्या अनुपस्थितीत देखील 24 x 7 ग्राहकांपर्यंत तुमच्या सेवेबद्दल किंवा प्रॉडक्टबद्दल माहिती पोहोचवून त्यांच्याशी चांगल्या प्रकारचे नाते तयार करून त्यांना ते प्रॉडक्ट किंवा सेवा विकण्यास मदत होते. म्हणजे जरी तुम्ही झोपेत असाल तरीदेखील तुमची ही सेल्स कॉपी तुमच्यासाठी काम करत असते. अशाप्रकारे जेवढे तुम्ही जास्त लोकांपर्यंत पोहोचाल तेवढ्या प्रमाणात तुमच्या सेवेचा किंवा वस्तूचा सेल होईल. त्यामुळे कॉपीरायटिंगला प्रत्येक व्यवसायामध्ये उच्च दर्जाचे स्थान असते. आता तुम्हाला कॉपीरायटिंगचे महत्व समजले असेल.

याच्यापाठीमागची व्यवसायिकांची सर्वात मोठी चूक म्हणजे ज्यावेळेस ते सेल्स कॉपी लिहितात त्यावेळेस ते स्वतःबद्दल सांगण्यात खूप वेळ घालवतात. पण ज्यावेळेस कोणताही ग्राहक तुमची सेल्स कॉपी वाचत असतो त्यावेळेस त्याला तुमच्याबद्दल काहीच देणंघेणं नसतं. ते फक्त तुमची जी काही सेवा किंवा प्रॉडक्ट आहे ती त्यांची समस्या कशाप्रकारे सोडवू शकते हेच पाहत असतात. त्यामुळे ज्या वेळेस तुम्ही सेल्स कॉपी लिहित असता त्यावेळेस तुमच्या प्रॉडक्ट किंवा सेवेमुळे ग्राहकांची समस्या कशा प्रकारे सोडवण्यास मदत मिळू शकते यावरती जास्त भर दिला तर तुमची सेल्स कॉपी नक्कीच फायदेशीर ठरेल. कारण कोणताही ग्राहक त्यांच्या शंकांचे निरसन करण्यासाठी तुमच्यापर्यंत आलेला असतो. त्यामुळे त्यांच्या या समस्येवरती जास्त फोकस करा आणि सेल्स कॉपी लिहिताना एक काळजी घ्यायची कमीत कमी शब्दात, साधी आणि वाचायला मजेशीर ठरणारी कॉपी लिहायची.

सेल्स कॉपी लिहिताना Features आणि Benefits या दोन संकल्पना समजून घेणं खूप महत्त्वाचं आहे. Features म्हणजे तुमचा प्रॉडक्ट किंवा सेवा काय आहे आणि Benefits म्हणजे तुमच्या प्रॉडक्ट किंवा सेवेमुळे ग्राहकांच्या समस्येचे निरसन कशाप्रकारे होऊ शकते. सेल्स कॉपी लिहिताना नेहमी Features वर भर न देता Benefits वर जास्त भर द्यायचा कारण हेच तर तुमच्या ग्राहकांना पाहिजे असते.

उदाहरण: आपण एक उदाहरण घेऊ सुरुवातीला वायर असलेली हेडफोन असायचे. हेडफोन कनेक्ट करण्यासाठी तुम्हाला ते मोबाईलला जोडावे लागत होते. ज्या वेळेस हेडफोन कंपन्यांनी वायरलेस हेडफोन बाजारात आणलं त्यामुळे मोबाईलला हेडफोन कनेक्ट करण्यासाठी वायरची गरज लागत नव्हती. कंपन्यांनी जाहिरातीमध्ये अशी टॅगलाईन वापरली "आता अतिरिक्त वायरांची झंझट नको", यामध्ये त्यांनी कुठेही वायरलेस हा शब्द वापरला नाही कारण वायरलेस हा शब्द हेडफोनच्या Features च्या संदर्भात येतो आणि "आता अतिरिक्त वायरांची झंझट नको" ही लाईन हेडफोनमुळे ग्राहकांना होणाऱ्या Benefits संदर्भात आहे. कारण ही एक लोकांची समस्या आहे आणि ती लाईन त्या समस्येवरती आधारित आहे. त्यामुळे जाहिरात लिहिताना नेहमी प्रॉडक्टच्या Features बद्दल न लिहिता त्याच्या Benefits बद्दल लिहिल्याने जाहिरात अधिक प्रभावशाली ठरते.

तुमची हेडलाईन ही अशी असली पाहिजे की जिच्या मदतीने तुमच्या ग्राहकांचे लक्ष तुमच्याकडे आकर्षित झाले पाहिजे. हेडलाईनमध्ये नेहमी, प्रश्न विचारणे, आकड्यांचा वापर करणे यावरती भर द्या.

उदाहरण: आर्थिकदृष्ट्या स्वतंत्र कसे बनवायचे? आर्थिकदृष्ट्या स्वतंत्र बनण्याचे 7 मंत्र, आर्थिकदृष्ट्या सक्षम बनण्याचे 7 रहस्य जे श्रीमंत लोक तुम्हाला सांगत नाही.